話說小編最近睇到一個有趣嘅冷知識，原來香港有一間中學曾經出產過兩位諾貝爾級別得獎者—物理學家崔琦同數學家丘成桐。
適逢2023年諾貝爾獎將會喺今個星期揭曉贏家，一齊認識下呢個獎項背後嘅故事啦。
諾貝爾獎歷史
追溯返歷史，諾貝爾獎係按照瑞典化學家諾貝爾嘅遺囑訂立，獎金由佢本人財產所成立嘅基金提供。諾貝爾獎原本設有物理學、化學、生理學或醫學、文學及和平五個獎項。其後，瑞典中央銀行喺1968年增設經濟學獎，令諾貝爾獎涵蓋嘅領域達到六個。
從未出現嘅獎項 唔少人都會好奇點解諾貝爾作為一個科學家，Phy Chem Bio三個科學領域佢都設立咗獎項，唯獨數學呢個同科學息息相關嘅領域佢就唔重視呢?
有一個都市傳說認為係源於當年諾貝爾嘅女伴同瑞典數學家米塔-列夫勒(Gösta Mittag-Leffler)出軌，以致諾貝爾對數學家懷恨在心。不過，並無證據證明諾貝爾曾經「帶綠帽」。事實上，諾貝爾無將數學納入諾貝爾獎係因為佢更重視能夠為人類帶來影響嘅領域，考慮到數學研究偏重於理論，所以就唔符合佢嘅準則。
睇到呢度你應該會問，既然諾貝爾數學獎唔存在，咁上文提到嘅數學家丘成桐到底攞咗咩獎？
另一個諾貝爾
丘成桐所獲嘅獎實際上名為菲爾茲獎(Fields Medal)。菲爾茲獎由1936年開始頒發，屬於數學界嘅最高榮譽之一，因此被譽為「數學界諾貝爾獎」。不過菲爾茲獎本質上同諾貝爾獎其實有唔少分別，例如獎項每四年先會頒發一次、得獎者必須為四十歲以下等等。
與此同時，數學界亦設有另一個年度獎項—阿貝爾獎(Abel Prize)。呢個獎係參照諾貝爾獎嘅形式而訂立，所以亦可被視作諾貝爾數學獎。
Comentários