最近有一單新聞提到一名台灣男大學生因為貪玩而食咗五粒「偉哥」。情慾難耐嘅事主隨後就同女朋友大戰咗一輪，但慘在佢完事之後發現自己仍然「一柱擎天」，結果最後需要搵醫生先可以「冷靜落嚟」，真係差少少就樂極生悲。一齊睇下男事主到底發生過甚麼事。
「性」在有你
Credit: urokingdom
當男性接觸到性刺激之後，陰莖海綿體嘅平滑肌(smooth muscle)會製造cGMP控制陰莖勃起。cGMP能夠令平滑肌放鬆，增加流入海綿體嘅血液流量，從而令陰莖勃起同變硬。不過喺勃起過程中，cGMP同時亦會被一種酶—PED5(磷酸二酯酶)分解。當cGMP被分解後，平滑肌就會收縮，令陰莖停止勃起。
坊間俗稱嘅「偉哥」(威爾剛，Viagra)係由輝瑞藥廠研發嘅藥物，用於治療男性勃起功能障礙。偉哥係一種PED5抑制劑，呢隻藥能夠阻止PED5嘅作用，令cGMP可以維持喺較高水平，幫助勃起功能障礙患者改善情況，猶如令用家得到「壯陽」效果。
Credit: Sci-Tech Vista
金槍不倒=生活美好？ 一般情況下，男性射精後就會進入不應期(refractory period，又俗稱「聖人模式」)。喺呢段期間，性刺激唔會再令到陰莖產生反應，所以男性射精後正常並唔會繼續勃起。至於新聞入面嘅男主角所經歷嘅情況源於佢服食咗過量偉哥，以致海綿體持續充血。 事實上，根據醫學觀點，持續勃起超過四小時以上嘅情況就屬於異常勃起(Priapism)。異常勃起係一種緊急症狀，因為海綿體長時間充血會令血液無法從靜脈回流，以致陰莖組織缺氧受損。假如患者怕尷尬而唔及時求醫，最嚴重嘅後果更加有可能會永久失去勃起能力。 不過異常勃起並唔算普遍，主因通常同疾病、藥物或陰莖靜脈受傷有關，用家只要適當使用偉哥就可以避免呢個情況。 錯有錯著
除咗藥效夠哂「把炮」之外，街知巷聞嘅偉哥亦都擁有一段傳奇身世。輝瑞藥廠最初其實係打算研發一種舒緩心絞痛嘅藥物，但受試者嘅回饋就令佢哋意外發現到呢隻藥原來可以改善勃起功能。
幾年後，輝瑞成功申請專利，並取得美國食品藥物管理局認可，令偉哥正式成為治療勃起功能障礙嘅藥物，令到無數有需要嘅男士可以重拾幸福。
經典重溫：「活塞男」
2008年8月6日，一名42歲男子因為下體卡住喺公園嘅運動鐵板而報警求助。雖然醫護人員曾經嘗試幫事主注射麻醉劑並為下體放血，但結果都係解救唔到佢，只能夠將佢連人帶板送去醫院。根據事主嘅講法，佢聲稱當時係因為欠債而被人逼食春藥先會搞成咁。最後呢單新聞不但受到海外媒體關注，事主仲成功「榮獲」達爾文獎，稱得上係一單怪人怪事。
Comments