「失敗乃成功之母」、「天才是一分天份加九十九分努力」……相信大家讀書時期寫作文嗰陣肯定有引用過愛迪生永不放棄，最後成功發明電燈膽嘅事跡做例子，但你又有無聽過佢鮮為人知嘅黑歷史呢？
電燈膽之父嘅出處？
有別於大眾嘅認知，愛迪生其實唔係第一位發明電燈膽嘅人。早喺1860年，英國物理學家斯旺(Joseph Swan)就用碳作為燈絲造出咗第一代電燈膽。不過基於當時技術有限，電燈膽嘅壽命並唔長。1878年，斯旺將真空技術配合電燈膽使用，呢個改動延長咗燈膽嘅壽命，而佢亦成功為呢款發明申請專利。
一年後，愛迪生都開始著手改良電燈膽。由於電燈膽係透過加熱燈絲去令燈絲發出可見光，燈絲嘅耐用程度會直接影響燈膽壽命。愛迪生於是同團隊反覆試驗多種材料，最終發現由日本竹絲製成嘅燈絲發光時間可以長達1200小時。
愛迪生嘅改良令電燈膽具備商業化條件，自此令到電燈膽開始普及。然而，愛迪生為自己嘅電燈膽申請專利就引起咗唔少爭議，包括被斯旺同另一位美國發明家告上法庭，最後需要經過法律訴訟先成功獲得專利權。
不為人知嘅陰暗面
除咗製造電燈膽之外，當年愛迪生公司亦係一間電力供應商，業務係透過直流電技術輸送電力。不過，當時直流電嘅缺點係只能夠短距離輸送，所以服務範圍有限。
有見及此，來自歐洲嘅發明家特斯拉(Nikola Tesla)就打算研發交流電摩打。交流電嘅好處在於電壓能夠被改變，只要提升電壓就可以長距離輸送，有助電力公司利用大型電網將交流電分配俾用家。
其後，特斯拉加入咗愛迪生公司工作，並向愛迪生提議發展交流電。但愛迪生對交流電無興趣，只係叫特斯拉幫手改良直流電技術，應承佢只要搞得掂就會有獎金。不過當特斯拉完成改良後愛迪生卻唔兌現承諾，亦都拒絕加佢人工。
呢段經歷令特斯拉覺得自己同愛迪生理念不合，所以決定辭職。特斯拉隨後加入咗愛迪生公司嘅競爭對手—西屋公司(Westinghouse Electric)。喺新老闆嘅支持下，特斯拉成功研發交流電摩打。
為咗唔想交流電技術威脅到自己嘅生意，愛迪生刻意對外強調交流電比起直流電危險，又令政府通過法案使用由交流電驅動嘅電椅執行死刑，試圖藉此展開輿論戰。
最終，基於交流電性質上比起直流電有優勢，愛迪生單靠公關技倆並唔能夠阻止交流電喺市場上掘起，佢更因此失去咗公司嘅控制權。隨著西屋公司喺1893年成為芝加哥世界博覽會嘅電力供應商，被交流電點亮嘅會場燈膽正式確立咗呢項技術嘅地位，亦為往後電力發展開啟咗重要一步。
總括而言，雖然愛迪生對於推動電燈膽技術進步的確有重大貢獻，但將佢定義為「電燈膽之父」未免誇大咗佢嘅功勞，亦忽視咗前人嘅努力。最後，愛迪生嘅身份除咗係一個發明家之外，更加係一個商人同老闆。佢為咗利益而剝削員工，甚至中傷競爭對手嘅處事方式到底又係咪值得參考呢？呢點就留返俾大家判斷喇。
References:
Comments