top of page
  • Writer's pictureNat

洗完嘅衫仲有噏味?教你從源頭拆解!


Laundry

到咗頻頻落雨嘅夏天,相信每個人屋企都試過晾衫晾唔乾,搞到啲衫成陣噏味。到底點解啲衫已經洗乾淨,但係如果繼續濕都會發臭?原來製造臭味元兇係依附喺衫上面嘅黴菌,加上棒狀桿菌Corynebacterium同葡萄球菌Staphylococcus等細菌。



身體嘅分泌物係幫兇?



皮脂

Credit: MediPlus


黴菌同細菌嘅養分來源偏偏就係我哋身體分泌岀嚟保護我哋皮膚嘅皮脂。皮脂具有油性、黏性嘅特質,以作於防止皮膚水份流失。不過,亦因為呢種特性,皮脂好容易殘留喺衣物纖維中,而且簡單嘅清水無法有效去除皮脂。


於是,黴菌同細菌就會以衣物上嘅皮脂為食糧,產生化學反應並製造岀具噏臭味嘅揮發性有機複合物。



洗完但唔乾都會臭?


基於上述原因,清洗完嘅衫上殘留嘅污垢令到黴菌同細菌有機會滋生。高濕度、常溫亦係令佢哋可以更適合繁殖嘅環境。每逢落雨天,落雨又無大陽,喺濕度高、温度稍低嘅環境,就啱哂黴菌同細菌生長,噏臭味就自然更濃烈。



點做可以防止噏臭?


只要考慮到上面提及嘅成因,包括黴菌細菌嘅存在、皮脂嘅殘留、濕度同温度,再逐一從源頭岀發就可以有效解決。例如,選用有效除菌去污嘅洗滌劑、落雨天時用抽濕機降低濕度、調高洗衣機嘅清洗溫度到高於40-60度等。不過記得要按照衣物清洗指引清洗,避免破壞衣物纖維。


另外,亦要避免將洗完嘅衣物存放喺洗衣機內太耐,入面高濕度以及長久積存喺內筒嘅污垢、黴菌細菌,如同令洗衣機變成

一個大型黴菌細菌嘅培養皿,所以定期清洗洗衣機亦都好重要㗎。


其實當處理好根本成因,要令衣物變香都可以好簡單,而且解決臭味嘅同時仲可以擊退影響健康嘅致敏源添~



References:

Callewaert, C., De Maeseneire, E., Kerckhof, F., Verliefde, A., Van De Wiele, T., & Boon, N. (2014). Microbial Odor Profile of Polyester and Cotton Clothes after a Fitness Session. Applied and Environmental Microbiology, 80(21), 6611–6619. https://doi.org/10.1128/aem.01422-14


コメント


bottom of page