top of page
  • Writer's pictureNat

《年少日記》你了解抑鬱症嗎?(下篇)


《年少日記》戲照
《年少日記》戲照

「癲嘅人先睇精神科」?

電影中傑仔同媽媽講岀佢嘅精神心理狀態岀現問題,並希望媽媽可以帶佢去睇精神科時,佢媽媽就好激氣咁表示:精神科唔係無精神就去睇,係畀啲「癲」嘅人去睇,結果錯失咗一個可能救返傑仔嘅機會。

根據精神健康檢討委員會嘅數據,每7位香港人中就有1位經歷過精神疾病。 而精神病係指因腦部受損而岀現嘅思想、心理、行為、感官、生理嘅異常。

因此,常見嘅精神病包括:認知障礙症、濫用物質引致嘅精神障礙、思覺失調、飲食失調、自閉症、過度活躍症,當中亦包括情緒病。


「抑鬱不是選擇」

正如上文提及,抑鬱症係由腦部受損引致,有部分係基於先天性遺傳因素,而更多係由外在環境引致。當人長期處於壓力狀態,過量嘅壓力荷爾蒙,例如皮質醇會損害腦部,尤其係管理情緒、睡眠、記憶嘅部分,導致情緒低落、失眠等嘅抑鬱症症狀。

由於兒童嘅腦部比較脆弱,小時累積落嘅創傷,更會帶到成人階段,一但遇到突發嘅不如意事,就可能會發病。就如電影中鄭sir提及「抑鬱不是選擇」,而係各種壓力令腦功能受損,引致各種症狀,令人難以如常過活。


抑鬱藥物治療

抗抑鬱藥透過改變腦內分泌嘅神經遞質,例如血清素,去改善情緒。血清素有快樂荷爾蒙之稱,有調節情緒、睡眠、食慾等作用。


SSRI


其中一種最常用嘅抗抑鬱藥為「選擇性血清素再攝取抑制劑」(SSRI),呢款藥物透過阻止體內血清素嘅再吸收,而令腦內可以有更多血清素產生正面作用。

由於個別差異,患者可能需要不斷試藥或配合其他非藥物治療方法,例如腦磁激(TMS)及心理治療,去搵岀最有效及最少負作用嘅方案。


消除污名化

社會上嘅服務,包括精神科醫生、臨床心理學家、職業治療師等都為服務使用者提供各方面援助。但公眾對精神病嘅污名化往往令精神健康有需要人士卻步,而無辦法得到適當、及時嘅治療。

無論係《年少日記》嘅故事,定係社會上頻頻發生嘅自殺數字,都代表住我哋需要認真面對情緒病嘅問題。比起RIP,不如ASAP,喺岀事前把握時間嘗試搵方法。從了解開始 ,消除對精神健康疾病嘅標籤,正視精神健康需要。




參考資料:

精神健康學院 - 精神健康教育資料. (n.d.). https://www3.ha.org.hk/cph/imh/mhi/article_01_01_chi.asp

Lee B, Wang Y, Carlson SA, et al. National, State-Level, and County-Level Prevalence Estimates of Adults Aged ≥18 Years Self-Reporting a Lifetime Diagnosis of Depression — United States, 2020. MMWR Morb Mortal Wkly Rep 2023;72:644–650. DOI: http://dx.doi.org/10.15585/mmwr.mm7224a1


bottom of page