汽水無疑係世界上最受歡迎嘅飲品之一，由其炎炎夏日大家都鍾意飲返罐凍汽水，但你又知唔知道呢款唾手可得嘅飲品即將要面臨斷貨危機呢?
阿拉伯膠(gum arabic)係一種由金合歡樹(Acacia tree)提煉嘅天然樹膠。阿拉伯膠嘅用途非常廣泛，以往主要用於印刷、顏料製作方面，現時就係一種常見嘅食品添加劑，同時亦係製造汽水必不可少嘅原材料。 製作汽水時，廠商會先調配出高濃度糖漿，隨後再加入水將糖漿稀釋。不過含有油性成份嘅糖漿並唔能夠溶於水，所以過程中需要加入乳化劑(emulsifier)。
阿拉伯膠係由碳水化合物同蛋白質組成嘅混合物。由阿拉伯半乳聚糖(arabinogalactan)重覆組成嘅多醣(polysaccharide)之間帶有分支，當中嘅糖分子連結住蛋白質。
Credit: Byju's
阿拉伯膠擁有非常高嘅水溶性，同時當中嘅蛋白質亦可以減少油性分子與水分子之間嘅排斥，呢兩種特性令阿拉伯膠成為理想嘅乳化劑，因此被業界廣泛使用。
然而，阿拉伯膠嘅主要產地蘇丹目前正爆發內戰，導致阿拉伯膠出口受到影響。專家估計現有存貨將會喺半年後用完，到時汽水就會可能會面臨斷貨。事實上，阿拉伯膠短缺所反映嘅唔單止係汽水供應問題，同時更提醒咗我哋地球嘅另一邊現時正遭受戰火侵襲，而當中所引起嘅人道危機亦應該被關注，祝願世界早日平安。
Credit: Reuters
Comments