究竟我地距離毁滅世界有幾遠？
1942年7月15日，三位一體實驗引爆世界上第一粒原子彈，之後嘅事大家都清楚，不過嗰日朝早為咗緩和氣氛，當時負責計算原子彈範圍半徑嘅費米（Fermi, 亦係50年代嘅量子力學巨星），開始一個賭局：賭原子彈爆發會唔會引爆大氣層。當年Edward Teller (氫彈之父)係三位一體核試三年前所提出嘅設想，究竟係唔係真嘅？
其實當年曼哈頓計劃嘅科學家，並唔清楚究竟原子彈嘅威力究竟有幾大。當年佢地嘅擔心之處係「小工具」釋出嘅熱力究竟只會引爆自己嘅燃料——5公斤嘅鈈，定係會燃點大氣層：即係解嚟自核爆嘅能量，將空氣之中嘅粒子融合，並且繼續加強連鎖反應， 直至整個大氣層都核融合為止。
想當然去到咁異想天開嘅問題，數學都係走唔甩，小編C就盡量簡單咁講啦。 要考慮原子彈會唔會點燃大氣層，我哋就要計算呢個反應裏面能量嘅收入同流失。
📥收入：大氣中最多就係氮氣，而正正氮原子亦係唔穩定嘅粒子之一，雖然兩粒氮粒子融合所釋出嘅能量好細，不過當大氣中絕大部份都係氮，積聚嘅能量就非常之龐大。
📤流失：係核反應之下電子可以係短時間內以電磁波嘅形散失其能量，科學家叫呢一種做制動輻射（Bremsstrahlung或Braking radiation），亦係整個核反應最大嘅能量流失。
當我地將流失除開收入，我地就會得出安全系數，數字越高，即係我地越安全。1936年嘅科學家亦都計算過只要數字大過1.6，燃燒大氣層就唔會發生。但係1.6呢個數字係非常低，咁點解呢幾十年以嚟，人類一直都進行好多種唔同形式嘅核試？而點解大氣層都一直存在？
其實1.6只不過係理論上嘅最低系數，實際上人類歷史上所頁核爆嘅安全系數都要高好多。究竟我哋距離毁滅地球相差啲咩呢？
係溫度：計算最低安全系數嘅時候，科學家估算如果要令到大氣層進行核融合，咁核爆時嘅能量就要大約攝氏一千億度先可以觸發連鎖反應。而係1936年嘅時候，就算想像之中威力最大嘅核彈，最多都只會達到攝氏一億度，同上限温度仲有指數級嘅距離。因為呢個原因，當年「小工具」嘅安全系數其實起碼有1000㗎！
咁但係如果我地真係好想引爆全個世界，大家一齊同歸於盡咁要點做？唔洗擔心！當年嘅科學家亦有同樣嘅問題，所以係1936年發表嘅文章亦都計算出所需嘅核彈重量：答案係2023年所有核彈嘅總和嘅20倍！
小編都係覺得仲有一大段距離。
Comments