top of page

和理學流行文化:《失憶蝴蝶》


The Key
《失憶蝴蝶》收錄於專輯《The Key》

一代歌神陳奕迅同填詞人林夕生涯合力製作過唔少膾炙人口嘅情歌,今次要討論嘅作品《失憶蝴蝶》收錄於專輯《The Key》,林夕以蝴蝶借代人類,描寫男女之間一閃即逝嘅愛情。



「蝴蝶記憶很短 留下什麼恩怨

回頭像隔世一笑便算」


蝴蝶成長階段
蝴蝶成長階段

蝴蝶嘅一生以不同形態成長,佢哋生命週期會經歷卵、幼蟲同蛹三個階段,最後先會羽化成蟲,發育成大家所熟識嘅模樣,呢個過程稱為完全變態(complete metamorphorsis)。蝴蝶嘅一生雖然美麗但亦短暫,多數品種嘅壽命只有幾個星期;較長命嘅都只能生存幾個月,所以繁衍後代係蝴蝶成蟲後最需要急切完成嘅事。


喺蝴蝶嘅世界,雌性擁有挑選對象嘅主導權,當雄性發現潛在對象後就會飛近對方拍翼,跳一段「求偶舞」嘗試吸引雌性。蝴蝶亦會釋放化學物質費洛蒙(pheromone)作為溝通方式,向同類異性傳達求偶訊息。



蝴蝶交配
蝴蝶交配時會背向對方

蝴蝶成功配對後就會隨即開始交配,雙方嘅腹部末端會互相連接,然後雄性就會將精包(spermatophere)輸入雌性體內,有趣嘅係過程中男女都係背向對方。除咗精子之外,精包內亦含有營養提供俾雌性孕育後代,所以雄性需要為交配消耗額外資源。



「隨時能歡喜亦隨時嫌棄

不用再記起怎去忘記」


有別於其他動物,蝴蝶交配後就會分道揚鑣。受咗精嘅雌性會去尋找合適嘅植物為產卵作準備;而雄性就會嘗試去搵其他雌性交配,以增加成功繁殖嘅機會。經歷過上述階段後,蝴蝶嘅愛情故事就會正式完結,而佢哋燦爛嘅一生亦都即將走到盡頭。





Kommentare


bottom of page