top of page

和理學流行文化:抗腦退化藥到底係良藥定毒藥?


《法與情》
《法與情》劇照

Credit: ViuTV


喺啱啱大結局嘅ViuTV電視劇《法與情》入面,由謝安琪飾演嘅女主角郭恩琪大狀為民請命,幫助一眾受害人控告一款會造成嚴重副作用嘅抗腦退化藥,最終成功爭取賠償金並令藥廠將藥物下架。


雖然劇情內容純屬虛構,不過近年的確出現過同抗腦退化藥相關嘅爭議。


腦退化症成因


腦退化症(Dementia,又俗稱老人痴呆)係一個統稱,泛指影響病人記憶力、思考能力及日常生活嘅一類疾病,而當中最常見嘅種類屬於阿茲海默症(Alzheimer’s disease),大約佔整體個案60-70%。


阿茲海默症

根據主流理論,阿茲海默症源於腦部出現蛋白質堆積物,積聚嘅類澱粉蛋白(amyloid protein)會形成斑塊,導致神經元受損甚至死亡。阿茲海默症並無法徹底根治,只能夠透過治療延緩病情。


業界最大醜聞?


2021年6月,美國食品藥物管理局(FDA)批准由美國同日本藥廠合作研發嘅阿茲海默症藥物Aduhelm上市發售。Aduhelm係一款單株抗體(monoclonal antibody),能夠針對性移除類澱粉蛋白,因此被稱為第一款真正針對阿茲海默症成因嘅藥物。


Aduhelm
Aduhelm











Aduhelm作用機制


Credit: Aduhelm


不過,Aduhelm成功獲批卻引起咗激烈嘅輿論。基於藥物喺第三期臨床測試嘅成效並唔達標,所以當時FDA嘅顧問團隊反對批核Aduhelm。然而,FDA並無接受建議,反而為藥物批出特別許可,導致事後有三位顧問團隊成員辭職抗議。


除咗療效成疑之外,Aduhelm亦存在危險性。調查發現約有40%接受過第三期臨床測試嘅病人都出現副作用,當中包括腦水腫、腦出血、頭痛同意識模糊等。考慮到呢款藥嘅不確定性,美國聯邦醫療保險和補助服務中心公佈判決,限制只有接受臨床測試嘅病人先能夠使用Aduhelm。 未來希望


雖然上述事件無疑會動搖大眾對藥廠同新藥物嘅信心,但係目前都有好消息值得病人期待。喺2023年7月,另一款阿茲海默症藥物Leqembi亦都獲得FDA批准。Leqembi可以延緩病情發展,適合早期患者使用,相信將會為病人帶嚟更多幫助。


Leqembi
Leqembi

最後,值得一提嘅係治療阿茲海默症係一個漫長嘅過程,所以除咗依靠藥物之外,家人嘅照顧同陪伴亦同樣重要。




Reference:




bottom of page