迪達拉係《火影忍者》入面「曉」組織嘅反派角色，本著「藝術，就是爆炸！」嘅理念，迪達拉嘅戰鬥風格極具特色，專長係利用查克拉配合爆炸黏土造成大範圍攻擊。
迪達拉喺火影入面最精彩嘅一役莫過於對決主角佐助，兩人經過一輪混戰之後不分高下。求勝心切嘅迪達拉使出必殺技「C4。迦樓羅」希望解決佐助，但可惜因為寫輪眼加上忍術屬性被剋制以致技能起唔到作用，最後慘敗主角光環之下。
C4其實搞邊科？
聰明嘅觀眾應該唔難諗到必殺技嘅名稱其實係對應現實世界入面一種真正存在嘅炸藥—C4。
Credit: PubChem
C4係二戰時期由美軍研發嘅炸藥，主要成份係一種名為RDX嘅有機化合物。RDX由氮、碳、氫同氧原子組成，爆炸時會釋放大量一氧化碳、氮氣以及其他氣體。高壓氣體嘅釋放會產生衝擊波，從而對周遭建築物同人造成傷害。不過有別於一般炸藥，C4嘅穩定性非常高，單靠物理撞擊無法引爆炸藥，即使用火點燃C4都只會燃燒，必須要依靠引爆裝置引爆。
C4最大嘅特點在於形狀可以被改變，作為一種可塑性炸藥(plastic explosive)，C4性質呈黏土狀，因此可以捏成不同形狀。呢個特點令用家可以因應環境放置C4，例如軍人執行爆破任務時可以輕易將C4放入建築物嘅牆壁同空隙入面；而迪達拉能夠利用爆炸黏土製作蜘蛛、巨龍等爆炸物嘅人物設定相信亦係根據呢個特性。
真人版迪達拉
Credit: FBI
不過，C4嘅威力同時都構成潛在風險，過去持續都有恐怖份子利用C4嘅案例，例如恐怖組織阿爾蓋達就曾經喺2000年利用C4對美國軍艦發動自殺襲擊，導致17名水手死亡。
另一方面，C4嘅便利性亦容易令到恐怖份子「有機可乘」，因為機場嘅X光機同海關往往難以察覺C4，例如一名男子就曾經喺2001年試過將C4收埋喺鞋底登上飛機，好彩最後炸藥無引爆。
雖然C4主要係由美國製造，供應受到管制，但非法走私嘅情況令到各地嘅恐怖份子都有機會獲得C4，以致C4經常牽涉於恐怖主義。
References:
Comments