適逢中秋佳節，當然要寫返篇應節文章。講到中秋就不外乎中秋三寶：月餅、燈籠、螢光棒，而我哋今次嘅主角就係螢光棒。大家又知唔知螢光棒點解會發光？
點解啪一啪就會發光？
螢光棒可以分為兩部分，第一部分係塑膠外層入面，包含螢光劑同草酸苯酯衍生物；第二部分係喺入面嘅玻璃管，包含雙氧水。當我哋啪螢光棒嘅時候，令玻璃管破裂，入面嘅雙氧水就會同草酸苯酯衍生物產生化學反應，酯類被氧化後，釋放二氧化碳同能量。
混合物中螢光劑嘅電子吸收上述釋放岀嘅能量，就會激發到受激態（excited state），由於呢個狀態係唔穩定嘅狀態，電子好快就會以光嘅形態釋放返過多嘅能量，以回復穩定嘅基態（ground state）。而將唔同種類嘅螢光劑加到入螢光棒中，就可以產生唔同嘅顏色。
一剎嘅光輝代表永恆？
螢光棒中嘅各種化學物有部分含刺激性或有毒成分，例如常用作螢光劑嘅PHAs，加上PHAs有長嘅半衰期，令佢難以分解而喺大自然中積聚，長遠影響生態。環保組織綠色力量2018年統計推斷，香港人單年就棄置超過三千萬支螢光棒，影響性不言而喻。
「誰都可發光只要找對地方」但對於今次嘅主角周圍發光對生態而言就唔係一件好事。其實想中秋佳節過得開心，有身邊人就已經足夠！Inscie祝大家人月兩團圓！
Comments