喺9月7日，香港人經歷咗百年一遇嘅暴雨，天文台更錄得158.1毫米雨量，係自1884年天文台有記錄以來最高。相信大家無論係親身體驗過，定係留喺屋企睇各媒體嘅相片，都會對於各區嚴重水浸嘅情況歷歷在目。
到底香港有咩水浸黑點，有咩設施防止水浸岀現，而暴雨又同全球暖化有無關係？
香港水浸黑點
Credit: 渠務處
跟據渠務處記錄，屬中、小或輕微嘅水浸黑點由1995年嘅90個，每年逐漸降低到2023年嘅4個。當中包括元朗新田石湖圍、大埔林村谷盆地、油尖旺漆咸道南、南區薄扶林村。
呢份名單主要針對由暴雨引致嘅水浸，排除咗因潮汐影響而發生水浸的地點，所以某啲大家常見嘅水浸地區就未必有包含在內。但對於今次屬於非水浸黑點嘅水浸地區，相關部門或需要重新審視該區嘅排水系統。
香港防洪設施
香港防洪措施主要有三個方向，包括：
截流：改變上游嘅雨水流向，直接排岀大海、河流
設施：雨水排放隧道 x 4 (共21公里)
Credit: 渠務處
蓄洪：將市區中流部分雨水暫存
設施：
現有蓄洪池 x 4 (大坑東、上環、跑馬地及安秀道)
規劃中蓄洪池 x5 + 計劃擴建大坑東蓄洪池
（規劃中嘅蓄洪計劃集中喺九龍區，以進一步防止該區嘅水浸風險）
Credit: 政府新聞公報
疏浚：將下流部分雨水有效排岀
設施：
地下雨水渠（>2400公里）
人工河道 （>360公里）
人手+機械式抓斗（清理渠道、河道垃圾）
Credit: 發展局局長網誌
百年一遇暴雨與全球暖化有關？
除咗防洪計劃嘅有效性，極端天氣成為難以控制嘅水浸因素。天文台數據顯示，1884至2022年期間年雨量、每年大雨日數有上升趨勢（達統計學上5%顯著水平）。
Credit: 天文台
全球暖化令水份蒸發得更快，促成降雨強度同頻率嘅增長。當暴雨雨量超過排水系統承載量，自然導致水浸情況。
人為嘅環境破壞，令極端天氣成為趨勢，對人類生存環境構成威脅。而作為應對，人類將需要以更多計劃去抗衡大自然災害。
參考資料來源：香港天文台、渠務處
Σχόλια